لينا و الجرذان

لينا بنيّة تونسية..

و هوما آش بش ندعي عليهم، يعطيهم دنيّة..

لينا طفلة هايلة..

و هوما أشوم من الشهيلي في عز القايلة..

لينا مدونة..

و هوما مستوى ثالثة جيم و أقلام ملونة..

لينا استاذة..

و هوما ماهم إلا فروخ بوماضة..

لينا مترشحة لجايزة نوبل..

و هوما المخيّر فيهم شطر قرايتو مدوبل..

لينا تستاهل..

و هوما فيبالهم النضال يجي بالساهل..

لينا العالم يعرفها من أمريكا حتى لروما..
و هوما المسخرة متع ولاد الحومة ..

لينا رمز ، نحبو ولا ما نحبوش..
و هوما كيف يجد الجد، يتخباو كي الببّوش..

لينا تكلمت وقت الدكتاتورية..

و هوما وقتها يتفرجوا في "القادمون" و يمارسو في العادة السرية..

لينا و التسمية هذي مفخرة للبلاد..
و هوما؟ لا عزاء للحساد..

لينا عورة..

و هوما.. جدت عليهم عملو ثورة..

و الطحانة.. مازالت تحسب

..السياسة شنعة أو لا تكون

في 14 جانفي 2011 ، طار خيار المستقبل إلى جدة بنيّة العمرة فإذا به يفاجأ بالشعب التونسي العظيم خرّجو من السلطة بعد شهر من العصيان المدني و المظاهرات السلمية و تقشقيش الحناك على تويتر. شهر ورّات فيه الأقلية البطريوطية (نسبة إلى يوسف بطريوت) للعالم أن تونس فيها شعب "يطلع منو"  فات حتى توقّعات رئيسو اللي في بالو عندو 11 مليون علّوش يسرح بيهم كيف ما يحب يخي طلعو موش الكل علالش..

و صارت أحداث، اتّفق القوم على تسميتها "ثورة" و ديركت انطلقو في حماية كائن اعتباطي ما عندوش وجود حسّي على أرض الواقع ما عدا هروب الزعبوع و حل التجمع و تحرير البرني وقتياً.
و لو إنو الزعبوع في قصر متبزّع، عامل جو ياكل و يشرب و يتڨرّع..
و لو إنو التجمّع كان وحدو و الناس الكل ضدو ، تحول لعشرين حزب و ما عادش تنجم تشدّو..
و لو إنو البرني بعد ما حرروه، ببركة ثلاثة محامين بنياطة سكّروه..

لكن ما عليناش..

يقول القايل  حماية الثورة من شكون و كيفاش و علاش؟ لا إجابة، هانا نحميو و برى حتى يسهّل ربي..

خبرة آلاف السنين و احنا نحميو..

و بدات رحلة البحث على ما يسمى "بأهداف" الثورة.. و علاش قامت الثورة، و شبيها لتوى ما وفات، و وقتاش تركح، و وقتاش تشعل..
قالو ثورة قامت على الكرامة ، على الخبز، على الحريّات ، على حقوق الإنسان، على الديمقراطية، و قالو زادة اللي هي قامت ضد الإمبريالية، و من أجل تعريب التعليم و تطبيق الشريعة السّمحة خلاص..

لكن نساو ، أو تناساو عامل واضح في الحقيقة، خرجت على خاطرو برشة عباد للشارع تعيّط و تستنشق في اللاكريموجان ، و بنّكت على خاطرو جموع على الميّة في ساحة القصبة تطالب بمجلس تأسيسي مش دارية حتى معناه..

العامل هذا هو الكورة و عقلية الفيراج .. و اللي ظهرت هي المحرّك الأول و الأخير للسياسة التونسية..

 اللي صار في الثورة يشبه ياسر لحاجة ديمة تصير في الرياضة التونسية: لفترة محدودة، دامت شهر تقريباً، تلمّو التوانسة ورا هدف واحد و حسّو بالوطنية 11 مليون تونسي قلباً و قالباً، بالضبط كيف ما يصير في الكوب دافريك وقتلّي ليكيب ناسيونال تبدى تلعب و تختفي العصبيات بين مكشخة و كليبستية و إتواليست..
فترة وطنية عرضية، توصل لذروتها كي يفصع الزعبوع ولا كي نهزو الكوب دافريك..
تليها فترة يحس فيها التونسي بالفخر و الاعتزاز بإنو تونسي و كأنّي حاجة استثنائية.. ويبدا يبوستي على الفيسبوك في حاجات كيما "^^ (; Fier d'être tunisien" و يحط العلم على البروفيل.. ويبدا يبوس و يعنّق في العباد في الكياس..
الفترة هذي عادةً ما تدومش برشة ، جمعة كان خلات، و بعدها تطير النفحة و يرجع التونسي ينسى المنتخب الوطني و يتلهى في جمعيتو ..

توا الحاجة الوحيدة اللي تبدلت، هي إنو جماهير الفيراج ولات تسمي في روحها "شباب الثورة"، و إنو بعد الانتماء للجمعية طلعلنا الانتماء للأحزاب..

و بعد ما كان الصفاقسي يسب في الإيتواليست، صبح النهضاوي يسب في البدبيست..
و مللي كان ولد باب سويقة يعاير في ولد باب الجديد، ولا ولد المؤتمر يعاير في ولد التجديد..

و هاك تشوف، أهل السياسة فهمو اللي في عقلية هذا الشعب الكريم، ما فما حتى فرق بين الميولات الكروية و الآراء السياسية.. وبدات الوجوه (أو بعبارة أصح، الرهوط) الرياضية في الظهور على الساحة الانتخابية ، شكري الواعر، صابر بن فرج ، ياسين بو شعالة، مهدي بن غربية، المنجي بحر، إلخ إلخ .. و عن قريب روبرتينهو و جوزي كلايتون..
لذا للأسف، الانتخابات اللي جاية، كان صارت، بش تكون أشبه ببرامج تلفزيون الواقع من نوع ستار أكاديمي.. بحيث الأكثر شعبية و اللي عندو أكثر مشجعين هو اللي يترشح بغض النظر عما إذا كان عندو ما يقدم للبلاد ولا حتى إذا كان حافظ جدول الضرب..
ستة اسابيع تفصلنا نظرياً على انتخابات المسّ تأسيسي، و هذي هي الوجوه السياسية الموجودة على الساحة اليوم.. هذي الوجوه اللي تحب نعطيها "الصلاحيات الكاملة":

عن حزب الفكرون المتطرف

الرأي العام ما عندو حتى أدنى فكرة على الدستور الجديد كيفاش بش يكون، و الطبقة السياسية من أحزاب و "مستقلين"، قاعدة توري فينا في نظرتها للناخب التونسي:
تكفّلّوا بعرسو، طهّرلو ولدو، أعطيه ما ياكل، حطلو كوارجي مشهور ولا مزاودي معروف.. و أتوا يصوّتلك ، و عن قناعة زادة..
نظرة لا تخلو من احتقار، لكن هذاكا الميجود..

و يقلّك دستور، آما دستور اللي بش يكتبهولك مجلس الهانة، و آما ديمقراطية اللي بش يأسسهالك؟
بين أحزاب قمة في الانتهازية تكركر في ايديولوجيات عمرها بين قرنين و عشرة قرون، عمرها ما خممت في مصلحة البلاد و ما ورّاتنا من الوطنية كان التبهنيس و الطحين..
و بين شخصيات داخلة الانتخابات شنعة و ع الجو، و تحب تنصب شيشة في المجلس و تقعد تاخذ في شهرية متع 4 مهندسين لمدة سنوات و سنوات حتى تشبع، كان قدر عليها ربي في نهار من النهارات بش تشبع..

و آما ثورة اللي مازالو يحكيو على حمايتها؟ الثورة في رايي للأسف وفات نهار الزين خرج منها.. خاطر وقتها الناس كانت على كلمة وحدة. توا وفا، باع و روّح.. و من غير ما تحاول تقول لواحد مكشّخ خمم في ليكيب ناسيونال وقتلّي هو مخو في الدربي على خاطرو مهوش بش يسمعك..
أمّا الثورجية اللي مازالوا يحكيو على مواصلة الثورة و تحقيق أهداف الثورة، المواطن البسيط فد منهم و من تبلعيطهم.. و خلّاهم يغنيو خارج السرب..

خلاصة القول..
تحبّو المواطنين يتلمّو على كلمة وحدة و يرجعو الكل يد وحدة في سبيل هدف مشترك؟
تحبّو التونسي ترجعلو الوطنية، و ينحي لمبدوزة من بالو عالقليلة شهيّر؟
مالا يا من عاش للكوب دافريك، مش هذي (خاطر يا ذنوبي..) ، اللي بعدها..
ولا يا من عاش للثورة الجاية ، مش هذي (خاطر يا ذنوبي..) ، اللي بعدها..

حوصلة رمضانية

خليني نستفتح هالتدوينة بالدعاء على اللي إخترع حاجة اسمها رابور د ستاج "rapport de stage".. الله يهلكو، لا يربحو و لا يرحملو عظم! كانو مات نشالله منو لقاع جهنم، و كانو حي نشالله قرد مريض بالسيدا يعتدي عليه بالفاحشة و تجي ناموسة تعطس عليه يموت..

خوكم البشّ اعتكف و انقطع عن العالم الخارجي جراير الرابور في سيدي رمضان وما عادش داري اربعا من خميس.. و ربي ينجّح جميع المومنين..
الحاصيلو مؤخراً بديت نرجع شيئاً فشيئاً و دبة دبة لمعترك الحياة اليومية و خزرت لهاك المدونة لقيتها خلاء و قفار تشكي لربي و تعيط ظلموني..
برى قلت خلي نحل الفيسبوك و نعمل طلة في العمق تو نلقى حويجة نقشقش عليها الحناك..و يا لهول ما رأيت!! الواحد رجع يلقى الدنيا تقلبت و الأحداث تتتالى بإيقاع خيالي..

أيا مالا بدون مقدمات، هذي عينة، دون ترتيب معين، من أهم الأخبار اللي فاتتني وقتلي قاعد نفلّم و نعبي في هاكا الرابور بالحشو، و إلا وقتلي قاعد نضرب في النوم نهار رمضان كيما كل مسلم طمعاً في الأجر..

وفاة سفيان الشعري:
 
أول شهيد بعد الثورة (حسب ما فهمت)..
جاتو سكتة قلبية طاح في بلاصتو الله يرحمو. إحتراماً ليه و لعايلتو، و لنسمة تيفي و مشاعر خونا فوّاز.. مانيش بش نسيب الريق البارد على الحكاية هذي بالذات..

الصعود الصاروخي لحزب الاتحاد الوطني الحر:
 
(Union Patriotique Libre نسبة ليوسف باتريوت) حزب آخر من احزاب الصدقة و اعطيني صوتك نعطيك تر*ـتي.. رئيس الحزب سي سليم الرياحي واحد كرزة يحب يعمل الخير و يرميه في البحر، ربي يخليه لتونس هو و باعث القناة.. هذا الحزب، للأسف، الصدقة ما ينويهاش لله و ما يذكرش إسم ربّي قبل ما يتصدق و لذا فإنو  سياسياً شي مش مقبول و لا يتماشى مع الهوية و ما يجيش و تفيه عليه و ما يحشمش و لازمو قانون احزاب يحكم فيه..
لا علينا، سي سليم ما منّوش خوف على كل حال.. الناس إلي كلات من خيرو تصوّتلو.. و إذا نجح بش يوكّل ما يكفي من العباد بش "يربح"  في الانتخابات فأنا أول مسانديه..

 باعث الحزب، سي سليم الرياحي

 أموات في الإنتخابات:  

بعد سلب المواطن المتوفي من حقه في الإدلاء بصوته ، تبين أن الإخوة الموتى غير راضين على الوضع و قررو بشتى الطرق بش يتغلغلو في المنظومة الإنتخابية وينتقمو من ها الإقصاء.. و بالفعل تمكنو من التقييد لـ118 من عناصرهم..
لم تعرف إلى الآن نوايا التصويت لدى المغفور لهم ، و لكن على الأرجح فإن الرئيس الأسبق الحبيب بورقيبة ينوي الترشح ضمن قائمة مستقلة.. خاصةً بعد رفض الائتلاف الدستوري قبول عضويته نظراً لـ"اختلاف جذري في الرؤى"..

النهضة قادت الثورة و الشهداء دساترة: 

و هكذا يسدل الستار على لغز الثورة التونسية الذي لطالما حير القاصي و الداني..
لكن ما دام الحكاية هكا مالا هذي ثورتكم ردّت اليكم، و السماح في البوعزيزي، التجمعي النهضاوي اللي حرق روحو بغية مرضاة الله و مساندةً لنضالات التجمع، أكبر حزب معارض في تونس في ذلك الوقت..

انتصارات رياضية بالجملة: 

بعد ما عشنا تألق أنس جابر في دورة رولان غاروس للقاصرات و تفوق المنتخب الوطني للفوت في بطولة إفريقيا للاعبين اللي ماعندهمش فيزا.. جاء دور منتخب كرة السلّة، البهيم القصير للمنتخبات التونسية بش يهز بطولة إفريقيا بعد إنتصار تاريخي على انغولا، إيه نعم انغولا، عبّيثة السلة الإفريقية و ما ادراك.. تلاه حصول حبيبة الغريبي على الميدالية الفضية في بطولة العالم لألعاب القوى..
و لعلكم لاحظتو، إلي منذ ڨطّع الزعبوع و الانجازات الرياضية تتوالى رغم عزوف الجماهير و تحوّلها إلى النشاط السياسي ، بحيث و قيل الرياضي التونسي ما يشجعوش "تينيزي تينيزي معاك ربي و النبي"  بقدر ما يشجعو السّكات..على كل حال شي يبشّر بالخير و يزيد يأكد على نجاعة هذه الحكومة و صدقها في القول و اخلاصها في العمل.. بش تخلي علينا بلاصة ها الحكومة :'(

زحل يا معذبهم:
 
ثاني أقوى عفسة في تاريخ البشرية بعد الڨذافي.. شعب السعودية برمته عازقو نهار رمضان.. الجماعة عندهم التكنولوجيا و التلسكوب و علم الفلك بكلو، و مسيبينو يتبعوا في أول فرخ بزاق يقوللهم ريت الهلال.. ما أحلاها فيهم..
يا أهل السعودية ، أهل النفاق و السطوكية ، براو يعطيكم زنس دنية، تجيكم قوية، بركة سيدي زحل اللي حشاهولكم ها العشية..
آه الشماتة مابنّها!

طالع زي القمر و الله

خلاصة القول، شهر رمضان السنة تبركالله صارت فيه أحدث غريبة عجيبة لا تحصى و لا تعدّ..في الرياضة، في الفن، في الفلك، في السياسة اللي تحب..

لكن الحدث اللي بقيت شخصياً نستنا فيه، وتمنيت ما يتعداش رمضان قبل ما يتحقق.. فليت عليه الفيسبوك، اليوتوب ، ڨوڨل و حتى إدونات.. و للأسف ما لقيتوش.. ما فماش ريحتو، لا يوجد، ولا حتى ربع خبر.. شي..

عيدكم مبروك!

!عم رشودة يا مشرفنا

ثناشن تدوينة، بلا رشودة!
و صوابيعي تاكل فيّا..
ثناشن تدوينة، و هاذيّة
تخربيشة لرشودة، هديّة..

عم رشودة، يا مشرّفنا!
غادي في بلاد الغربان

عم رشودة، يا مشرّفنا
هوني في بلاد العربان

مْنِ بلاد الفرعون أخبار:
رشودة شرّفهم بزيارة..
طاح يسيّـب في الخنّـار
دوب ما هبط من الطيارة..

قاللهم ع الليـبـرالية
هذي والله بدعة كبيرة..
مصر راهي إسلامية!
..ياخي عملوه تكركيرة

جاب ربي جاهم مللخّـر
و قلّهم نحلم بالخلافة..
و هوني في تونس يبهبر،
يتبلعط و يزيد يتفافى..

الخلافة حلم بعيد..
قالـلهم، ثم اعـتـدل
قبل ما يصب دمعة، و يزيد:
البرنامج هو الحل!

جينا على ذكر البرنامج..
سمعنا بيه من هاك المرة
مية و خمسين يكتبو فيه،
ما أثقل عص أمهم و برا..

تبركالله ملا زيارة،
حاصيلو تعمل الكيف.
ربي يهديكم يا مصارة
جايبين الغنوشي ضيف!

و يا رشودة آش بش نقلّك..
رانا في سيدي رمضان
لساني متربّط يحرزلك،
خايف نفطر، بالسبّان

اللهم إني صائم.. اللهم إني صائم!

!نصيحة اليوم، ما تقيّدش

بـطـّلـت، و هــاني اليوم بالذات أعـلنـتها عـلى الملـأ

رانـي مـانـيــش بـش نـقـيـّد، و مـا عـادش مـكـتـرث

انتخابات وذني، تي حتى كان جات إنتخابات بالحـق

قـلــّـو بـرا قـيـّد قــال، حـلـوّ، هــذاكـا الـلـي مـازال

يـاخـي نصـوت ولا ما نصوتـشي، تـي كـيـف كـيـف

ديـزونـي، الانـتـخـاب  مـا عــنـدي مـا نـنـدب بـيــه

مـا تـقـيّدش خويا، خوذها نصيحة مني، مـوش لازم 

اقـعد غـادي، التـقيـيـد مـوش مـبرر راهو، أخـطـــاك
-------------------

أكبر راكبي الثورة: الشعب

خويا.. شبيك تتكلم باسم الشعب؟

خويا.. الشعب 99% مسلم و مش عاجبوا إلي قاعد تعمل فيه..

خويا.. الشعب ما عملش الثورة بش تقعد أنت تسيب في التمنييك و الضمار البايخ متاعك!

خويا.. الشعب ما يسمحش لحد بش يلتف على ثورتو..
خويا.. البوليس لازمو ياقف في صف الشعب..

خويا.. تحيى الثورة ، يحيى الشعب!

خويا.. الشعب يسلم عليك و يقولك ما تـ*ـراش فيه بالحرية!

آ صديقي، ايجا نقلك.. سيّبني راك صرعتني بالشعب متاعك.. و معاش تعيطلي خويا..

لا يا فلان.. آسف.. الثورة ما قامش بيها الشعب.. قامت بها ثلّة من الاحرار اللي للأسف ظهر بالكاشف اللي هي أقلية في هالبلاد الكلبة..

اللي خرج بن علي ما كانش الشعب.. بالعكس، على حد علمي الشعب هو إلي صوتلو بالأغلبية الساحقة..

و اللي قاوم بن علي ما كانش الشعب.. بالعكس، في بالي الشعب هو اللي قعد يبندرلو و لأنسابو لمدة 23 سنة، وما زال لتوى..
و اللي تعذب في عهد بن علي ما كانش الشعب.. بالعكس، على حد علمي الشعب هو اللي دخل في السيستام و دبر راسو بين رشوة و طحين..
و إلي قال "خبز و ماء و بن علي لا" ما كانش الشعب.. بالعكس، ظاهرلي الشعب هو اللي عاث فيها فساداً بالڨرافات، و الشعب هو اللي بطل الخدمة و قعد ديمة مبنك يحل في مشاكلو السياسية و الإقتصادية بالڨعدة ع الميّة..
و اللي قال لا لبن علي ما كانش الشعب.. بالعكس، الشعب مشى عليه دكتاتور، قال بليّصة و تفاضات..

الشعب جاتو هناني بناني،..
بضعة ألوف، يعطيهم الصحة، فاقوا اللي العيشة مع بن علي و جماعتو تنقص فالعمر و تقسم الظهر..
ها البضعة ألوف تحرّكو، تمرّدو، قالو لا، كمبسو، تكتكو، تضربو، تربطو، سبّو، برّحو، بكاو،..
...
ماتو..

و اللي بقاو منهم هاوكم شطرهم و قيلا طلع صهيوني و تجمعي و عميل، و الشطر الآخر عدك بيه..

ربي يهديهم، ما تحرروش وحدهم، حررو معاهم 11 مليون..
11 مليون يا بو قلب!
قداش منهم ما يعرف الكرامة كان من المسلسلات و من حكايات العروي..
و قداش منهم الحرية ما تعنيهش لا من قريب لا من بعيد..
و قداش منهم الديمقراطية ما يطبقهاش في دارو..
و قداش منهم تقلو إنتخابات يقولك شوف حكاية أخرى احكيها؟

تقلي 11 مليون (أو ما يعبر عنه "بالشعب") عمل ثورة، ولا طرد بن علي؟ دويو..
هل 11 مليون لكلها لسانها تسيب توا و اش بش يلم هاكا الريقة..  
شكون ركب الثورة قد الشعب؟
و هوما الناس اللي  "ركبو على الثورة" ماهم إلا أفراد هذا الشعب..
و أعداء الثورة اغلبهم أفراد هذا الشعب..
و التجمعيين و المندسين..
 و القناصة و البصاصة..
 و قوى الردّة و ضبوط الڨردة..
و رموز الفساد و الحسّاد..
و العملاء و ريوس البلاء..

أغلبيتها الساحقة (خلينا نقولو 99%) ماهم إلا أفراد هذا الشعب الكريم، و أبناءو المخلصين..

لذا أيها الشعب الكريم.. من فضلك أخرج منها!

------------
ختاماً ، لا يفوتني أن أتقدم بأسمى عبارات الشكر و العرفان للصانع الحقيقي للثورة و الرجل الذي قال مهأه.. و أن أضع فيه كل الثقة التي سحبتها اليوم من الشعب، حتى يواصل قيادة البلاد بنظرته الثاقبة و حكمته اللامتناهية.. شكراً ياسين العياري! :)

أيها المواطن، برا قيد روحك و ارجع

credits:isie.tn

اليوم أول يوم في التسجيل للإنتخابات اللي بش تتم في 23 أكتوبر كان سهل ربي و الظروف..

و كان الدنيا قعدت رايضة..

و كان الشعب التونسي قعد عاقل..

و كان نوّّر الملح..

و كان الهيئة العليا للانتخبات خدمت خدمتها مليح..

و كان الهيئات الفرعية خدمت خدمتها مليح..

و كان أعوان البلديات و القنصليات و الإدارات الحكومية تخلاو على الكسل المزمن وخدمولنا بإيقاع جابوني لمدة 3 اسابيع..

و كان البهيم نبتولو جوانح..

و كان الحكومة صفّّات النية مع المواطن و نقّّصت من التفدليك عليه و اللعب بأعصابو..

و كان المواطن ضغط على الحكومة و ما خلاهاش تفدلك عليه و تلعبلو باعصابو..

و كان قوى الثورة المضادة هبطت عليهم طير أبابيل و قضات عليهم واحد واحد..

و كان الدول المسلمة الديمقراطية الخليجية نقصو من النغرة و خلاونا نخلطو عليهم شوية في الديمقراطية..

و كان الدول الكافرة الدكتاتورية الغربية سيّّبونا رايضين و خلاونا ننورولهم الطريق و نعلموهم الديمقراطية ..

و كان جيوب الردة تنقبو..

و كان فلول التجمع.. تجمعو مع بعضهم و فلّّوا من البلاد..

كان صار هذا الكل، و أنا متفائل إنو بش يصير هذا الكل.. الإنتخابات بش تتم في موعدها المقرر وهو 24 جويـ.. عفواً 23 أكتوبر وما هيش بش تتأجل..

لذلك يا مواطن، نقص من البخل و برى قيد روحك في القوائم الإنتخابية بدون تأخير..

ولا نقلك؟ قلي الساعة لشكون بش تصوت تو نقلك تقيد روحك ولا اخطاك..

 مش على حاجة ، تعب عليك و مصروف و برا.. و زيد البلديات اش بش يقيدلهم 7 ملاين ناخب في 3 جمعات.. خمم في خوك الموظف الزح!

عشرين سنة عِشرة - من أجل سوريا

20 سنة.. عِشرة..

أيام تجي، و سنين تمشي، و بيناتهم المحبة ما تمستشي..

20 سنة.. عِشرة..

هو ليها كنز، و نور العين، و هي ليه الروح، و قلب حنين.. 

20 سنة.. عِشرة..

هو بوها، خوها، و حبيبها.. و الخبزة للدار هو يجيبها.. 

20 سنة.. عِشرة..

و كل يوم،

يفيق الفجر، يصلّي و يقصد ربي،

و هي تفيق معاه، وتوصلو للباب.. و قلبها بالغرام معبّي..

و كل يوم،

يخرج يخدم، في بدلة أنيقة،..

وهي تقوللو، بلهجة، تقول موسيقى :

    - الله معك تقبرني..

    - الله يخليكي، بتوصي شي؟

    - بس تِرجعلي بالسلامه.. دير بالك على حالك..

    - يلا، خاطرِك، يا كريم!

و يطبعلها بوسة على الجبين، و أخرى بين العينين..

و يقصد ربي..

و كل يوم،

يروّح من خدمتو.. في الليل،

بعد نهار مضني، وجهد طويل..

و كل يوم،

يلقاها تستنّاه في الدار،

و يجرى بيناتهم حوار كيف هالحوار.. 

    - أهلين إبن عمي، حطلّك شي تاكلو؟ تقبر قلبي هلق بحضرلك العشا..

    - آخ، خلّيني بس إرتاح شويّ..

    - قعُد إرتاح، هلق بتكون تعبان من الشغل، تسلملي ها الديّات هات لبوّسن..

    - استغفر الله العظيم، شو تبوّسيهن ما تبوّسيهن؟! إنت علي أغلى من ديّاتي..

    - تسلملي يا نور عيوني.. يلا، العشا جاهز..

    ...

    - الحمد لله، يا الله ما أطيبو ها العشا، إيه والله كإني عم باكل من الجنِهّ..إلاهي يخليلي ها الأصابيع يا قادر يا كريم..

    - و لك الله يخليلي ياك يا تاج راسي.. 

و يقعدوا سهرانين، فرحانين، متسامرين،

يحكيلها على نهارو، وتحكيلو على يومها..

و يقوللها مشاغلو، و يخفف عليها همومها..

20 سنة.. عِشرة..

و كل يوم يخرج زاهي في الصباح، و كي يروّح و يشوفها ينسى تعبو، و يرتاح.. 

20 سنة.. عِشرة..

و اليوم..

مشى في الصباح، و ما رجعش..

مشى في الصباح،

و لقى روحو في مظاهرة ضد الرئيس..

و جاتو رصاصة في قلبو، من مكحلة بوليس..

مشى في الصباح.. 

و العشا حاضر برد، وهي حاطة يدها على خدها، و تستنّى 

و هو يخزرلها متبسم، الفوق، في الجنة..

مشى في الصباح..

توأم روحها و رفيق عمرها الحنين..

ما قعدلها منو، إلا بوستين،

بوسة على الجبين، و أخرى بين العينين..

التفليم العربي المقدّس

- يا البشّ قوم و يزيك من النوم..الجماعة يتعاركو..
- تي شفمّا نشالله خير..
- أية هاو قلك لحمت في الهيئة العليا، نحطو مناهضة التطبيع مع الكيان الصهيوني في العقد الجمهوري ولا لا؟ هويتنا عربية إسلامية ولا بربرية قرطاجية بيزنطية ولا برازيلية ماخذة بالخاطر في كلايتون و دوس سانتوس هههه..
- و لتوّا مازالوا في هالعقد المحنون؟ كل شوية يطلعولنا بحكاية مالحيط يكسرولنا بها البطاطا.. تي بربي اش مدخّل إسرائيل في إنتخابات تونس، آش كون إلي جبدها الحكاية جيبوهولي.. هذا اسمو التفليم العربي المقد ّس .. 

- أسمع مانيش بش نسئلك شنوا هوالتفليم العربي المقد ّس..
- سؤال في محلو!

- تحشى..
- درت في حياتي بين البلدان، و شقيت بحورات  و وديان، وغير العربي ما لقيتش رهدان..
الزبراط يقولك الشعب مسلم ولن يستسلم، حطها في الدستور بش ما ننساهاش..
و يقولك سكر سيتات البرني، أما اعطينا بروكسي ما تنساناش..
السراق يقولك طبق الشريعة، أما اخطى إيدي ما تقصهاش..
و السياسي يقولك فلسطين بلادي، و إسرائيل ما نعرفهاش، وكي غزة تتقنبل يقولك بيناتهم ما مدخلناش..
هذا يا صديقي،هو التفليم العربي المقد ّس..

آش خلانا حتى لتوة نتفوخرو باللي اخترعنا الصفر ولا اكتشفناه  و نحنا ماللي اكتشفناه قعدنا عليه و ما بارحناه..
التفليم العربي المقد ّس
آش خلا إسرائيل كيف يصدم عليها الجيش العربي المقدام توكلو طريحة في 6 أيام..
التفليم العربي المقد ّس
آش خلانا نبهبرو بحضارة القرن العاشر و إقتصاد الزكاة.. وقتلي هارون الرشيد شايخ بالجواري و أبو نواس كان أكبر زبراط..
التفليم العربي المقد ّس
آش خلانا نبندرو لرواحنا و نقولو شعب قاري و متثقف و رزين، وقت إلي نسبة الأمية غادي من العشرين ، و وقت اللي الممترز في الحقوق ما يعرفش يركب بالسوري كلمتين..
التفليم العربي المقد ّس
آش خلا "نظرية" المؤامرة تاكللنا مخاخنا تقولش عليه العالم خايف و لاهي بينا.. و هو كان يخطانا ناكلو بعضنا و ندورو على والدينا..
التفليم العربي المقد ّس
آش خلانا نحكيو عالهوية كأنها حاجة مسلّمة ما نمسّوهاش، و كي يحكيو عليها الڨورّة نقيمو عليهم الدنيا و ما نقعدوهاش..
التفليم العربي المقد ّس
آش خلا واحد كيف بن لادن بطل و معذب الماريكان،سياسيينا يترحمو عليه و بورقيبة يسبّوه و ما يخليوهش حتى في قبرو يطمان..

التفليم العربي المقد ّس
آش  خلانا نسميوها ثورة حريات، وقتلي دوب ما واحد يحل كشختو ندوروها تكفير و تهديدات..
التفليم العربي المقد ّس

مالا فلّم بابا فلّم..
وكان تحب قيد التفليم في الدستور، في العقد الجمهوري، ولا حتى في "post-it" علقو في الفريجيدار..
ولا نقلّك؟ جيبلي ورقة وستيلو تو نعملك دستور قمقوم، بلعوط، خفيف نظيف، و الناس الكل ترضى بيه..
أية بسم الله، نبداو بالفصل الأول، الكلنا حفظناه، "تونس دولة حرة مستقلة ذات سيادة الإسلام دينها و العربية لغتها و الجمهورية نظامها"..
الفصل الثاني: "تونس دولة مناهضة لكل أشكال الصهيونية و الماسونية والإمبريالية"..
تحبش حاجة أخرى؟

- إيه براس أمك حطلنا فصل ضد التشيع..

- الفصل الثالث: "تتصدى تونس لظاهرة التشيع و التشييع باعتبارها دخيلة على المجتمع"  وشنوا آخر؟
- ضد حملات التنصير..
- الفصل الرابع: "يمنع منعاً باتاً ممارسة التنصير في كامل تراب الجمهورية"، حاجة أخرى؟
- ما تنساش الإلحاد زادة، مشكلة كبيرة هالأيامات..
- مشات معاك، الفصل الخامس: "لا يتمتع الملحد بالجنسية التونسية حتى ينطق بالشهادتين".. واصل، دستور تحفون..
- إكتب حرية المعتقد مضمونة..
- براس أمك؟ تفدلك؟

- لا وراس لحنينة نحكي بجدي..

- و اش تقصد بحرية المعتقد؟

- تي معناها طفلة كي تلبس الحجاب ولا طفل كيف يعمل لحية ما نقلقوهمش..

- آه هكاكة مشات معاك، الفصل السادس "يكفل الدستور حرية المعتقد لكل تونسي، و يتم تحديد مفهوم المعتقد بواسطة قانون يصدر للغرض"..  تحبش تزيد حاجة؟

- "تجيزوا لنا الإغتصاب"..

- بالرسمي؟!
- لا هذي نفدلك هههه.. 
- نختموها مالا مسك بالفصل السابع "تتكفل الدولة بصنصرة البرنغرافيا و الفيسبوك و كل ما من شأنه أن يعكر صفو المجتمع ويتم ذلك بمجرد إيداع مطلب لدى محكمة الحومة"..
نتصور يزيه الدستور، هاو سبعة فصول تبركالله و ما ناقصو شي، وكلو تفليم يعني يمثل الشعب التونسي في محيطه العربي و المغاربي ككل.. برا هز الورقة هذي أطبعها، مدها للهيئة العليا وقولهم يعملو عليها إستفتاء ويرتحونا من معبوكة المسّ تأسيسي..
خلي عالأقل فلوس الضرايب تمشي في حاجة تصلح..

!الماسونية في خطر، يا مرمّاجية العالم فيييقووو

بمناسبة التدوينة السابعة، هذا الرقم السحري المبارك، يعلن البـشّ عن ولائه المطلق واللّامحدود للماسونية العالمية، حسب مقتضيات الفصل السابع من البروتوكول التأسيسي للحركة الماسونية..
و يأبى البـشّ لنفسه، بصفته مرمّاجي حر إختصاص كنتول و عضو فاعل و مرموق في نقابة البنــّاية الأحرار، إلّا أن يصدر بياناً يوجهه للإخوة الماسونيين وللرأي العام، يندّد فيه بالحملة الشنيعة المسلّـطة على الماسونية منذ فترة ليست بالوجيزة :

نصّ البيان:

بعد السلام وبعد الثناء على المولدي البناي منظّر و مؤسس الماسونية العالمية..
أيها الماسونيون، أيتها الماسونيات،

اني لأخطّ هذا البيان و قلبي يعتريه أسى و لوعة بل و حرقة على حركـتنا المباركة .
فقد بلغني فيما بلغني من الأخبار، أن بعض الجهات ممّن لا يفقه للديمقراطية معنًى، و ممّن احترف معاداة الماسونية، قد بدأت فعلياً حملة تحريضية لتعكير صفو المحفل الماسوني الأعظم المزمع عقده يوم السابع و العشرين من هذا الشهر..

و إنه لا يسعني، أمام هذا الموقف الخطير، سوى أن أشدّ على أيدي اخواني الأحرار من البنّـائين و البنـّايات و أن أجـدّد دعوتي لإنجاح هذا الموعد التاريخي الهام..

أيها الماسونيون، أيتها الماسونيات،

إن المحفل الماسوني الأعظم لهو موعدنا وموعد كل بنـاي غيور على ماسونيته للوقوف على مكتسبات هذه الثورة و منعها من الإرتداد إلى الوراء، وقد اعلنّا يوم الإثنين 27 جوان جمعة الهدم و إعادة البناء مواصلةً لهذه الثورة العظيمة التي أرادها الأحرار ثورةً للماسونية فركبها الأشرار بكل إنتهازية. و أرادها الشباب التونسي الماسوني الحر ثورةً للبرني فالتفّ عليها الجرذان..

لقد قطعنا عهداً بحماية هذه الثورة المجيدة وبأنـنا لن ندع جيوب الردّة و ضبوط القردة تهدد هويتنا الماسونية. فكيف نرضى عن هذه الهوية بديلاً و الحال أن 99% من الشعب التونسي ماسوني أباً عن جد؟ لن يهدأ لهذا الشعب بال حتى ينص الدستور القادم في فصله الأول على أن تونس دولة حرة مستقلة الماسونية دينها و حك الصدر لغتها و الكوس و البركار نظامها، و حتى يصبح المساس بالماسونية جرماً يعاقب عليه القانون.

أيها الماسونيون، أيتها الماسونيات،

لقد عانت الماسونية في عهد المخلوع و ازلامه من التهميش و التحقير و اضطرت للعمل السري كما صودرت حرية ممارسة شعائرها و تعرض كل من سولت له نفسه ارتياد حلقات الماسونية إلى التضيـيق و المراقبة اللصيقة. وإذ نعتز بتاريخنا النضالي فإننا نستنكر لجوء البعض إلى محاولة تشويه حركتنا المباركة و مغالطة الرأي العام  و هي ممارسات تذكرنا بالعهد البائد و اساليبه المعادية للماسونية.
إنّ حركتنا الماسونية العالمية كانت ولا تزال تقف إلى جانب الشعب التونسي الذي ثار ثورته و كانت أول مكاسبها عودة الشيخ الأسطورة المولدي البناي من المنفى الاختياري و عودة المثـلـّثات إلى التكاثر في ظل هذه الصحوة الماسونية المباركة. و بالمناسبة أحيّي نضال الشيخ المولدي البناي و أناشده الترشح لانتخابات المجلس التأسيسي، بوركت يا شيخنا الجليل.

و في الختام أقول لزبانية النظام السابق و لمن يسعون إلى تجريد الشعب التونسي من هويته أن تونس الأبية، تونس الصمصة و البريك لن ترضى بديلاً عن الماسونية. و إن لم يعجبكم، فموتوا بغيظكم.

عن اللجنة المركزية لنقابة البناية الأحرار

البـشّ

..يا وفاء، ربي يهديك

بين حرب داحس والغبراء اللي شاعلة في المتلوي وبين عنتريات صانع التحول المبارك.. اللي نخيّر الصمت على اني نحكي عليهم عملاً بالحديث اللي يقول "من كان يؤمن بالله واليوم الآخر فليقل خيراً أو ليصمت"، على خاطر ما عينيش توّة بش نقوم نسب في القبيلة والفصيلة و الراتسة متع بعض الناس..

..الحاجة الوحيدة اللي بقات من أحداث اليوم هي حكاية وفاء جوة اللي قلبت الدنيا (على إعتبار أن الدنيا ماهيش مقلوبة بطبيعتها):

أنا شخصياً، و من موقعي كحامي للثورة و كتونسي غيور على دينو، حبيت نوجه عتاب للأخت وفاء، وحبيتو يكون على لسان الشخص اللي قالت، والله أعلم، إنو ضربها:

يا وفاء، ربي يهديك!
حاصيلو هاو في بالي بيك..
من التجمع، سمعت بيك..
ومن التبهنيس بربّي يزيك..

بالعاني تكسر في إيديك!..
قال شنوا تعديت عليك..
نحنا راهو في حزب الديك..
حاقرينك وما على بالنا بيك..

تتبلاو على حركتنا..
وتجيو بلاش فيزا لحومتنا..
على قد ما تونس ظلمتنا..
تكمّل إنت؟ عيب عليك!

يا وفاء علاش تلزّ فيّا..
بش نعمل أخطاء فردية..
تحوّس في محلي يا بنيّة..
مجبور نمد أيدي عليك!

و نحب نقلكم يا جماعة..
كلو تخويف وفزّاعة..
ما تسمعشي كلام الإذاعة..
رانا ملايكة ، سيّب عليك..

!يا أنس يا معذبتهم

أنس جابر بطلة رولان غاروس للوسطيات 2011

 

حبيـت في التدوينة هذي نهنّي لاعبتنا أنس جابر على ها الإنجاز اللي إن دلّ على شيء فإنه يدلّ على الرعاية الموصولة التي ما فتئ سيادته..
لحظة شوية التليفون ينوقس..

- وي ! تفـضل.. إيـه لاهي قـاعد نكـتـب في تـدوينة وأنـت قصـيـت عـلـيا..شبيـك اش تحب؟..
شنـوة؟! ثــورة؟ متـع آش؟ متع بـرني؟؟ و بـن عـلي، ويـنو؟ خـليك معـايا ما تعلّـقــش..

يا جماعة بن علي هرب!!!

نرجعـو لموضوعنا، هـذا الانجاز اللي إن دلّ على شيء فإنه يدلّ على .. على ..

- وي ألـو مازلـت معايا؟ قـلـّي التـلـفـزة والصحافـة تبدّلـتـشي بعـد الثورة هذي بربـّي؟ شـيّ..؟

 

سامحوني!
قلت، إن دلّ على شيء فإنه يدلّ على الطاقات التي تزخر بها بلادنا و المكاسب التي ما فتئت تتحقق للمرأة التونسية منذ التحوّ.. منذ الإستقلال وعلى وعي هذا الشباب، شباب الثورة الذي ما انفك يرفع التحديات ويشرّف تونس في جميع المحافل الإقليمية و الدولية.. هذا الشباب الواعي الذي وقف له الكونغرس الأمريكي احتراماً وصفق له لمدة ثانيتين وربع الثانية..

بعد هذا الإنجاز نقول لأنس، ومن كل قلبي المفعم عادةً باللامبالاة، والمغمور هذه المرة بالفرحة والإعتزاز:

برافو على هذا النصر المبين في ميادين الفرنجة..

أنس وخيّتي تبارك الله عليك.. عيني ما تضرك..
نشالله مبروك..واصل و بقدرة العالي ما تكون هذي إلا بداية التألقات..

لا عزاء لقلابس الفيسبوك.. ونشالله تكبر وتعمل كاريار هكـّا كيما.. أنــّا كورنيكوفا..

كيفاه؟ كورنيكوفا ما هزت حتى لقب! سامحني مالا أنس، مش قصدي، نشالله يا ربّي تهز تيتروات قد عدد المربّـطين في ها البلاد!.. أما الله غالب، الـبـشّ راهو ما يعرف من جوارات التنس، كان هذي:

الشيخة أنــّا، أو المساحة المخصصة للتنس في ذهن الـبـشّ

..التونسي و التبندير، قصة ثورة

بن علي هرب، بن علي ڨطّع ... ڨطّع للسعودية..

زعمة التونسي بعدو تبـدّل؟ ولا الحالة هيا هيا؟..

ماللّي كان للزين يبـندر، و يلحّس للطرابلسية..

بن علي مشى عليه، والتجمّع كيف كيف، و جات الشرعية الثورية..

زوز ملاين مرسّـميـن، في التجمع منخرطين، ذابوا بين نهار و عشية..

***

بن علي هرب، بن علي ڨطّع ... و ولّـينا كلنا ثـوّار..

والغنوشي طيّـرتـو القصبة، وقفولو قدام الدار..

الغنوشي الآخر جاء، تلمّـولو آلاف في المطار..

كنا في الطحين مجتمعين، ولينا في الثورة متحدين، و بعد رجعنا الجار ضد الجار..

جماعة "All cops are bastards" و جماعة تنادي بالإستقرار ..

***   

بن علي هرب، بن علي ڨطّع... و السّـبـسي راجل كبير..
ورغم ذلك دوب ما هبط، عطاوه حقو من التـبنـدير..
عجـبهم جايبـها فـدلاك، و قعد يسيّـب في التـضومير..
ضحكـولو تمد على طولو، توّا تكـلّـمو يقـلّـك طير..
ردو بالكم تخسروني، و ما عندكم منـيـن تشـدوني، مني ما فماش ما خير..

***
بن علي هرب، بن علي ڨطع... و طلـعـلنا الراجحي فرحات..
بوهالي و ما عندوش الخـبث، سرقولو البورتابل و المرايات..
شطر البلاد هبلت عليه، و ناشدوه للانـتخـابات..
خرجّلهم عالفيسبوك، يحكي في كلام إشاعات..
قالو والله قال الحـق، الدنيا بش تتـحرق، أمّة غدوة كلاو الزلّاط..

***

بن علي هرب، بن علي ڨطّع ... زعمة  بعدو وين ماشين..

قال المكـي كاكاوية،هاي الأحزاب آش و ثمانين..

حكّ راسك و اعمل حزب.. حك ترمتك و أعمـل "sit-in"..

لا، و اللي فاتك أغرب، و نحنا في همومنا غاطسين..

قال لك هيا نلـمّو بعضنا.. ونمشو نهدّو على فلسطين..

***

!خلي البرني يحلّق يرحم بوك

أيّا اليوم في العشية نسمع في موزعيق وعامل جو على إليسا ونانسي و فن عصر الانحطاط.. يهبط خبر غير متوقع، خبر خلاني ننڨّز في بلاصتي من هول ما سمعت..

يحبو يقطعو علينا البرني، إيه نعم يحبو يحرمونا من البرني!!!

لمحة عن البرني:

البرني

 البرني هو طائر كاسر، أو لاحم كيما تحب..

عانى البرني في عهد سيء الذكر  و أعوانه من القمع ومن حرمانه من حريته في التحليق والإنطلاق والوصول إلى بيوت الناس في كامل تراب الجمهورية.. وتم التنكيل به و الزج به في عداد المفقودين حاله كحال زملائه من سجناء حرية التعبير..
ورغم هذه الممارسات المنافية لحقوق الحيوان ما فتئت شعبية البرني تزداد خصوصاً في صفوف الشباب التونسي و العربي.. حتى أن أكبر شهداء الأمة دفع حياته من أجله.. و قد كان التونسي مولعاً بتربية طير البرني و يمارس هذه الرياضة بسرية مطلقة و بطرق ملتوية حتى لا تقع عليه أعين السلطات..

تمكن الشعب التونسي في النهاية من تحرير البرني بعد ما يعرف بثورة الياسمين والتي لا يزال البعض يصر على تسميتها بثورة البرني على إعتبار أن تعبير ثورة الياسمين تعبير دخيل ولا يعبر بصدق عن أهداف الثورة..

الشباب التونسي في شارع الحبيب بورقيبة يحرر طائر البرني من القفص 

أيا علاش نطول عليكم في الهدرة؟ بعد ما  استرجع البرني مكانتو في قلوب التوانسة جاو حارة محامين من أعداء الطير و العصفور وهواة قصّان الأجنحة وأحباء الأقفاص المغلقة، يهلكهم، يحبو يحرمو هالحيوان المحبوب من الطيران بكل حرية.. لمجرد أنهم عياو ينشو في الذبان وما لقاو ما يصنعو..

لهؤلاء أقول:  اغسلو ساڨيكم و أرڨدو..

و ليبقى البرني، حراً طليقاً أبد الدهر!!

كل توخيرة.. وفيها تكركيرة

 
البارح و أنا نقلّب في الفيسبوك.. طحت بالفيديو هذي، حول تأجيل الانتخابات :

"توضيح" كمال الجندوبي حول اقتراحه تأجيل إنتخابات المجلس التأسيسي

عاد قلت نحكي كلمتين مع سي كمال الجندوبي، نفتتح بيهم على بركة الله أشغال هذه المدونة..

يا سي كمال الجندوبي.. مرحبا بيك.. تفضل زارتنا البركة.. تشرب حاجة؟
أسمع يا سي كمال إيجا نقلك..
 آااش لزّك؟ ديراكت لا سلام لا كلام دخلت علينا بصدمة وقلتلنا بطّلت، أهلي غصبوني حليلي و ما عينيش ؟!
ناس تستنّى في الانتخابات بالدقيقة وناس ما جاهاش النوم وناس ربي يعلم بيها..

يا سي كمال الجندوبي..
24 جويلية راهو ماهوش مجرّد تاريخ..
24 جويلية نهار نبنيو فيه تونس جديدة ونقطعو فيه رسمياً مع ماضي التجمع وبن علي..
24 جويلية نهار نختارو فيه ناس عندنا ثقة فيهم و يمثلونا.. مش طرحة شيوخ قارين فرد مكتب ويخدمو بتوقيت رمضان.. 
24 جويلية نهار نرتاحو فيه من العملية الإنتقالية، اللي ما رينا منها كان وجيعة الراس، وتطييح القدر، وتطويل اللسان.. وساعات الضرب بالزلّاط..
24 جويلية كلمة رجال، وكان تتبدّل وعدي على رجالك يا تونس.

يا سي كمال الجندوبي..
نعرفو اللي العباد بدات تشم فيها قارصة كل ما يقرب الموعد وما تراش في أي تقدّم يذكر في ملف الانتخابات.. ونعرفو اللي حلم 24 جويلية بدا يتبخر شيئاً فشيئاً عندو مدّة وما قعدنا مكبشين فيه إلا بحكم ثقتنا في ربي والمثل الشعبي التونسي اللي يقول "المستحيل ليس تونسياً" (اللي على فكرة في كل بلاد تلقاه سبحان الله!).. ونعرفو اللي إنت حطوك في الواجهة على خاطر إنت جات عليك ال"مي" متع "شي لافورمي" ورصاتلك تتحمل مسؤولية إعلام دار الميت بالفاجعة، وحدك وبكل شجاعة.. لكن الكلام هذا كان لازم يتقال قبل، على خاطر الظروف اللي ماهيش متوفرة اليوم كان لازم تكون متوفرة البارح وما توفرتش..

يا أيتها الهيئة العليا (والعالي ربي) للانتخابات ، قبل ما تحط اللوم على روحك وتحسسنا انك ربما ما تستاهلش الأمانة التاريخية الموضوعة على عاتقك، وقبل ما تحسسنا اللي إنت كيف هاكا الطالب اللي ضايع فيها غدوة إمتحانو ومفجوع من البروغرام..

..أرجع للي بعثك وقلّو راهو الجواب ما وصلش.. وقلو يا تكبس روحك وتخدم خدمتك في وقتها، يا إما عندنا حديث آخر معاك.. 

وبالمناسبة..
فاش قام 16 أكتوبر؟ نهار بايخ وخاري-في (عزيزي القارئ،  كان عيد ميلادك 16 أكتوبر.. بربي إنتحر شنوا هالتعاسة اللي عايش فيها؟! )..
أنا نقترح نهار مشهود، فضيل ومحمود، تضرب فيه الطبلة والناي والعود، والبندير بلاش حدود، يوم الفرح الدائم وضرب البارود ..
إيه نعم.. هذاك هو، اللي بالي بالك.. وبالأمارة هاي ورقة بو عشرين أعمل طلة..

أيا شوفولنا بليّصة

هيا السلام عليكم ..
قولولي مرحبا بيك في البلوغسفير .. مدوّن جديد ينضم للعايلة الموسّعة و الجيش العرمرم متع المدوّنين التوانسة..

أيا نبدا نقدم روحي.. و قيل لازم منّو..

أنا، و أعوذ بالله من كلمة أنا، ملا أنا، مش نورمال، تبارك الله عليا، الله الله علي، وحدي، ونعجبني عالاخر برجولية، وحيد نفهملها، ربي يعرف كل شي أما أنا قليل إلي ما نعرفوش...

أنا، و أعوذ بالله من كلمة أنا، من أوائل الناس إلي خطرلهم يحلو بلوڨ، كان ذلك  في يوم ربيعي خلاب من أواخر الثمانينات، نهارة إلي رزق والداي بمولود بهيّ الطلعة.. أول ما خممت فيه كي خرجت للدنيا : طفيو الضو..
ثاني ما خممت فيه كي خرجت للدنيا : أيا برا نحل بلوڨ..
وقتها فكرة المدوّنات ما كان يعرفها، إي كومپري العبد لله، كان زوز من الناس، أنا و واحد صاحبي يخدم في الموساد..

ثالث ما خممت فيه كي خرجت للدنيا : أيا برا نعمللها تعسيلة..
ومن وقتها...

أنا، وأعوذ بالله من كلمة أنا، عندي و الحمد لله راي في كل شي، من الرأسمالية و الشيوعية للّون متاع عينيك.. ديما ندلي بالدّلو متاعي في كل صغيرة و كبيرة..
كيفاش؟ منين نعرفك بش نحكي على عينيك؟ تي فيقلي شبيك ماكش مركّز(ة) عالمهم؟!

نرجعوا لموضوعنا، و أرفع صبعك قبل ما تقاطعني..
للأسف، وين نجي ندون الدرر إلي تدور بالخلد متاعي، و المنجرة عن حالة تقصي و حكم دائم على خلق الله و تصرفاتهم، و تدخل غير مسبوق في أمور دينهم و دنياهم ، والبحث المتواصل على الشقيقة و الرقيقة و الطبيب باش مات (لقيت الرقيقة وما زالولي الزوز لخرين)..
.. يجيني النوم، و نعمل تعسيلة..
ومن وقتها...

و جاء 2011 ، والثورة في تونس قامت، وأنا ما قمتش..
و جاء 2011 ، و الشعب فاق، وأنا ما فقتش..
و جاء 2011 ، و البلاد تبدّلت، و أنا ما تبدّلتش..

حتى جاء اليوم..
اليوم شربت بزايد قهوة الصباح، و في لحظة إندفاع قصوى لقيت نفسي في حالة نفحة عارمة وقررت بش نحلّ والديه هالبلوڨ المحنون. و قررت بش نتحفكم بالبناويت متع أفكاري..

هيا مالا قبل ما توفى الدوزة متع الكافيين، نبداوها على بركة الله
بالنقد البناي،..
و بالنقد الهدام،..
و بالكلام للكلام،..
و بأضغاث الأحلام،..
و يا الحبيبة قولي جيتام،..
و جملة أخرى توفى بل"آم"،..

و السّلام،..